李慧詩講錯一句「希望日本贏中國」耿耿於懷 冀從錯誤中學習

「牛下女車神」李慧詩在2023年退役,由運動員身份退下來,今年亞運會她換個角色成為電視台節目主持,卻因直播期間口快快說錯一句:「希望日本贏中國」,引來重大風波,備受批評。

她趁聖誕假期在社交媒體連日分享今年圍繞她身邊的各種事情,並以長文提及這宗口誤風波,更指出:「已經過咗幾個月,當時諗唔到點處理,一直屈喺心度」,又指此事令她耿耿於懷。

李慧詩在杭州亞運為電視台出任節目主持,卻因講錯一句話引發風波。(李慧詩Facebook)

李慧詩寫道,「退役後,有幸有得做live 節目,做主持,從來無接觸嘅範疇,好驚自己做得差,講錯嘢,所以一直唔敢鬆懈。不過愈驚愈錯,直播每一日,我都有講錯嘢,最嚴重,係我講咗『希望日本贏中國』。」

「當日第一次報線道,每十秒出一隊,廣告時我就同自己講:唔洗加鹽加醋㗎,清清地就好啦~到日本出場,我講咗以上7個字當刻就知唔對路,所以我講中國個國字高音咗,之後就到拍檔馬詠茹介紹中國出場,無得補救,心諗⋯⋯大鑊,點解唔講『唔知日本係咪準備好贏連贏幾屆嘅中國』,又或者『日本要贏中國都好高難度』呢?」

「我自問由始至終都唔係激進分子,直播我都有講希望印度、黎巴嫩、難民會贏,但作為旁述,講其他隊贏國家隊就令人髮指。我都覺得接受唔到,所以好快,我就被攻擊。」

李慧詩在奪得世界冠軍後,穿上彩虹戰衣出戰2019年的世界盃。(Getty Images)

事緣當時李慧詩為杭州亞運女子4X200米自由泳接力決賽做直播旁述,中國和日本同為金牌熱門,她介紹日本隊時不慎說錯一句「希望日本贏中國」,隨即被內地網民和KOL圍攻,之後建制派立法會議員李梓敬等人亦加入聲討行列。3個月後,李慧詩感言:「今次呢個大陷阱,無得怨人。不過,Live 就係人生,無得返轉頭,唯有經一事,長一智,從錯誤中學習,之後直播謹慎啲。」

她繼而為此事向杭州亞運香港代表團團長霍啟剛及Hoy TV致歉,「抱歉呢段時間為霍生同Hoy TV 同事添麻煩,亦想感謝知我錯咗依然鼓勵我堅持、不離不棄嘅朋友,同贊助商、電視台依然相信我。」李慧詩亦表示,自2019年開始,間中便有人在她的Facebook留下人身攻擊留言,她強調:「我只係個土生土長嘅香港人,真心希望,如果可以,如果真係愛香港,不如唔好再做打手,一齊用行動令呢啲地方變得更好。」


This is a companion discussion topic for the original entry at https://hk01.com/sns/article/975372